LMV3-M6 રોકેટ: ભારતનું શક્તિશાળી લોન્ચ વ્હીકલ

નવીદિલ્હી,તા.૨૩, ઈસરો ૨૪મી ડિસેમ્બર ૨૦૨૫ના રોજ બ્લુબર્ડ બ્લોક-૨ મિશન લોન્ચ કરવા જઈ રહ્યું છે. આ મિશન આંધ્રપ્રદેશના શ્રીહરિકોટામાં સતીશ ધવન સ્પેસ સેન્ટરથી LMV3-M6 રોકેટનો ઉપયોગ કરીને લોન્ચ કરવામાં આવશે. આ લોન્ચનો હેતુ અમેરિકામાં સ્થિત AST સ્પેસમોબાઇલના બ્લુબર્ડ બ્લોક-૨ સેટેલાઇટને લો અર્થ ઓર્બિટ (LEO)માં તહેનાત કરવાનો છે. આ સેટેલાઇટની સૌથી મોટી ખાસિયત એ છે કે તે અવકાશ-આધારિત મોબાઇલ બ્રોડબેન્ડ સેવા પ્રદાન કરશે, જેનાથી સ્માર્ટફોન યૂઝર્સ સીધા અવકાશથી ઇન્ટરનેટ કનેક્ટિવિટીનો ઉપયોગ કરી શકશે. શું LMV3-M6 રોકેટની શક્તિ આ મિશનને સફળ બનાવશે? LMV3-M6 એ ISRO ની હેવી-લિફ્ટ લોન્ચ સિસ્ટમ છે, જેમાં ત્રણ તબક્કાઓનો સમાવેશ થાય છે: બે સોલિડ સ્ટ્રેપ-ઓન બૂસ્ટર (S200), એક લિક્વિડ-ફ્યુઅલ કોર સ્ટેજ (L110), અને એક ક્રાયોજેનિક અપર સ્ટેજ (C25). ૪૩.૫ મીટર ઊંચું અને આશરે ૬૪૦ ટન વજન ધરાવતું આ રોકેટ ૪,૨૦૦ કિલોગ્રામ સુધીના પેલોડને જીઓસિંક્રોનસ ટ્રાન્સફર ઓર્બિટ અથવા LEO માં લઈ જઈ શકે છે. અગાઉ, LVM3 એ ચંદ્રયાન-૨, ચંદ્રયાન-૩ અને વનવેબ મિશન જેવા મુખ્ય પેલોડને સફળતાપૂર્વક ભ્રમણકક્ષામાં પહોંચાડ્યા છે. બ્લુબર્ડ બ્લોક-૨ સેટેલાઈટ LEOમાં લોન્ચ કરાયેલો અત્યાર સુધીનો સૌથી મોટો કોમર્શિયલ કોમ્યુનિકેશન સેટેલાઈટ છે. તેનો ધ્યેય વિશિષ્ટ ઉપકરણોની જરૂર વગર મોબાઇલ સ્માર્ટફોન પર સીધી અવકાશ-આધારિત બ્રોડબેન્ડ સેવાઓ પ્રદાન કરવાનો છે. આનો અર્થ એ છે કે યૂઝર્સ કોઈપણ સ્થાને તેમના સ્માર્ટફોનથી હાઇ-સ્પીડ ઇન્ટરનેટનો ઉપયોગ કરી શકે છે. આ ઉપગ્રહ નવી પેઢીની ટેકનોલોજી પર આધારિત છે અને ભારતના વાણિજ્યિક અવકાશ ક્ષેત્રમાં એક મુખ્ય સીમાચિહ્નરૂપ માનવામાં આવે છે.શું આ લોન્ચ ભારતની અવકાશ ક્ષમતાઓને નવી ઊંચાઈઓ પર લઈ જશે? બ્લુબર્ડ બ્લોક-૨ મિશન ભારતના અવકાશ ક્ષેત્રમાં વાણિજ્યિક લોન્ચની વધતી જતી ભૂમિકા પર ભાર મૂકે છે.